Այս տարի, 2025 թվականին, Հայաստանում անհատույց դոնորների արյունատվությունը 2024 թվականի համեմատ աճել է 37.1 %-ով։ Այս տվյալը հրապարակվել է այսօր՝ Արյան դոնորի համաշխարհային օրը, ՀՀ առողջապահության նախարարության կողմից։
Համաձայն հրապարակված տվյալների՝ 2023 թվականին Հայաստանում արյան դոնոր է դարձել 22162 մարդ, որից 2037-ը եղել է անհատույց։ 2024 թվականին այս թիվը հասել է 23600-ի, որից անհատույց դոնորների թիվը կազմել է 2495։ 2025 թվականին արյան դոնորների ընդհանուր թիվը կազմել է 26554 մարդ, որից անհատույց դոնորների թիվը զգալիորեն աճել՝ հասնելով 3421-ի։
Առողջապահության նախարարությունը նշում է, որ այս տարի հիմնական ուշադրությունը կենտրոնացված է երիտասարդների ներգրավման և Հայաստանում կամավոր, անհատույց արյունատվության մշակույթի ձևավորման վրա։ «Յոլյան» արյունաբանության և ուռուցքաբանության կենտրոնի հետ համագործակցելով՝ նախարարությունը իրականացնում և ընդլայնում է կամավորական արշավները՝ նպատակ ունենալով արյուն հանձնելը դարձնել ոչ թե մեկօրյա ակցիա, այլ տարվա բոլոր օրերին գործող գիտակցված սովորություն։
Հիշեցվում է, որ արյան նվիրաբերությունը կարող է կյանքի հույս դառնալ նորածնյա երեխայի և նրա մոր համար՝ ծննդաբերության ընթացքում առաջացած բարդությունների դեպքում, վիրահատարանում գտնվող պացիենտի համար, ինչպես նաև քաղցկեղի և արյան այլ հիվանդությունների դեմ պայքարող երեխաների և մեծահասակների համար։
