Հայաստանի ֆուտբոլի ազգային հավաքականի նախկին դարպասապահ Ռոման Բերեզովսկին վստահ է, որ թիմի նախկին ավագ Հենրիխ Մխիթարյանը կշարունակի իր ֆուտբոլային կարիերան Միլանի «Ինտերի» կազմում։
«Իհարկե, ես շատ ուրախ եմ, որ Հենրիխը կերկարաձգի «Ինտերի» հետ պայմանագիրը։ Ոչ մի կասկած չկա, որ նա ևս առնվազն մեկ տարի իր խաղով կուրախացնի բոլորիս այս մեծագույն իտալական ակումբում։ Ինձ թվում է՝ այս նորությունն է՛լ ավելի կմեծացնի հետաքրքրությունը ֆուտբոլի նկատմամբ Մխիթարյանի անհատական երկրպագուների շրջանում, որոնք շատ են ոչ միայն Հայաստանում, այլև ամբողջ աշխարհում»,- ասել է Բերեզովսկին։
Ավելի վաղ հաղորդվել էր, որ Հենրիխ Մխիթարյանը մտադիր է մնալ Միլանում և արդեն պատրաստակամություն է հայտնել շարունակել հանդես գալ «Ինտերի» կազմում։
2025/2026 մրցաշրջանում 37-ամյա Մխիթարյանը «ներաձուրիների» կազմում մասնակցել է 39 հանդիպման՝ դառնալով 4 գոլի և 3 գոլային փոխանցման հեղինակ։ Նրա և «Ինտերի» միջև գործող պայմանագիրը լրանում է այս տարվա հունիսի 30-ին։
