Այսօրվա նիստում Հեռուստատեսության և ռադիոյի հանձնաժողովը (ՀՌՀ) կայացրել է որոշումներ, որոնց համաձայն «ՇԱՐԿ» ՍՊԸ-ի «5-րդ ալիք» հեռուստաալիքին կիրառվել է 400․000 դրամ տուգանք, իսկ «Հայկական Երկրորդ» հեռուստաալիքին՝ գրավոր նախազգուշացում։
ՀՌՀ-ի կողմից իրականացված մշտադիտարկման արդյունքում պարզվել է, որ մայիսի 17-ին «5-րդ ալիք»-ի եթերում հեռարձակված գովազդը չի համապատասխանում քարոզչության սահմանված կարգին։ Ըստ հանձնաժողովի՝ գովազդը պարունակել է ազգային և համաշխարհային մշակութային ժառանգության վարկաբեկման և նսեմացման տարրեր։
Կոնկրետ օրինակներում նշվում է, որ քաղաքական գովազդում Մեծ Եղեռնի զոհերի հուշահամալիրը ներկայացվել է որպես մզկիթ, իսկ Մայր Հայաստան հուշարձանի փոխարեն՝ Աթաթուրքի արձան։ Բացի այդ, գովազդը չի ներառել նաև ընտրություններին մասնակցող կուսակցությունների կամ թեկնածուներին բնորոշող խորհրդանիշներ կամ այլ նշաններ։
ՀՌՀ-ն նաև արձանագրել է, որ մայիսի 12-ին «Հայկական Երկրորդ» հեռուստաալիքի «Լրաբեր» լրատվական հաղորդման ընթացքում խախտվել է կուսակցությունների նախընտրական քարոզչության վերաբերյալ անկողմնակալ և գնահատականներից զերծ տեղեկատվության ներկայացման պահանջը։ Այս խախտման համար հեռուստաալիքին կիրառվել է գրավոր նախազգուշացում։
Հեռուստատեսության և ռադիոյի հանձնաժողովի կողմից կայացված որոշումները ուժի մեջ մտնելու պահից երկամսյա ժամկետում կարող են բողոքարկվել Հեռուստատեսության և ռադիոյի հանձնաժողով կամ ՀՀ վարչական դատարան։
