Հայկական ապրանքները Ռուսաստանից Եվրամիություն վերահասցեավորելու խոստումը, որը հայտնի դարձավ վերջին օրերին, ֆարս է։ Այս տեսակետը հայտնեց տնտեսագետ Աղասի Թավադյանը՝ «Աբովյան time» հաղորդաշարի ընթացքում։
Ինչպես հիշատակվում է, ՀՀ էկոնոմիկայի նախարար Գևորգ Պապոյանը հունիսի 3-ին հայտարարել էր ջերմատնային ապրանքների արտահանման սուբսիդավորման և ԵՄ արտահանվող թարմ պտուղ-բանջարեղենի մաքսատուրքի վերադարձի մասին։ Իսկ հունիսի 12-ին նա հայտարարեց ՌԴ այցելության և հայկական ծագման ապրանքների խնդիրների քննարկման ծրագրերի մասին։
«Պետությունը հայտարարում է, թե կուղղորդի հայկական ապրանքները Եվրամիություն, բայց դա ֆարս է։ Ես համոզված եմ, որ կառավարությունը արդեն փորձում է կարգավորել ՌԴ-ի հետ հարաբերությունները, քանի որ ընտրական բոլոր հարցերը գրեթե լուծված են համարում և կարծում են, որ կարելի է աշխատել հարաբերությունների նորմալացման, ոչ թե փչացման ուղղությամբ», – նշեց տնտեսագետը։
Նրա խոսքով՝ կառավարության հույսն այն էր, որ ընտրություններից հետո ամեն ինչ կհանդարտվի և հնարավոր կլինի լեզու գտնել Ռուսաստանի հետ, սակայն իրավիճակը մնացել է լարված։
«Սահմանափակումները մեծ խնդիր են առաջացրել ՀՀ կառավարության համար։ Սա նույնիսկ ինչ-որ չափով ֆորսմաժորային իրավիճակ է, քանի որ նման բան չէին նախատեսել։ Կարծում եմ, որ մեր կառավարությունը կուլիսներում արդեն իսկ երկխոսության մեջ է հարաբերությունները հարթելու համար», – ավելացրեց Թավադյանը։
Նա նաև ընդգծեց, որ Հայաստանի ներկայիս տնտեսական իրավիճակը և արտաքին առևտրային կառուցվածքը թույլ չեն տալիս կտրուկ խզել կապերը Ռուսաստանի հետ՝ առանց լուրջ հետևանքների։
Տնտեսագետը նշեց, որ 2018 թվականից ի վեր Հայաստանի արտահանման ծավալները դեպի ԵԱՏՄ շուկա աճել են գրեթե հինգ անգամ, մինչդեռ դեպի Եվրամիություն արտահանումը կրճատվել է 1.5%-ով։ Այս համատեքստում նա թերի և նախընտրական խոստում որակեց իշխանության այն պնդումները, թե կաջակցեն ԵՄ ապրանք արտահանող տնտեսվարողներին։
Օրինակ բերելով գյուղատնտեսական արտադրանքն ու ծաղկաբուծությունը, որոնց արտահանման մոտ 94%-ն ուղղվում է Ռուսաստան, Թավադյանը նշեց, որ ռուսական շուկայում եվրոպական սոխուկների ներմուծման սահմանափակումների պատճառով հայկական ընկերությունները սոխուկները ներկրում են Հայաստան, աճեցնում, դարձնում հայկական ապրանք և մեծ եկամուտներով վերարտահանում Ռուսաստան։ Նրա խոսքով՝ այս ամենից հետո տնտեսապես անիմաստ է դառնում այդ սոխուկները բերել Հայաստան, աճեցնել ու հետ ուղարկել Եվրամիություն։
Տնտեսագետը նաև նշեց, որ բացի մաքսային արգելքներից, Եվրամիության հետ կան բազմաթիվ ոչ մաքսային սահմանափակումներ, մինչդեռ հայաստանյան գործարարներն արդեն իսկ կայացել են ռուսական շուկայում։
Հիշեցնենք, որ վերջին ամիսներին Ռոսսելխոզնադզորը մի քանի փուլերով սահմանափակել է Հայաստանից ՌԴ ներմուծվող տարբեր ապրանքների՝ թարմ պտուղների, ծաղկային արտադրանքի և այլ կերպարարարված ապրանքների ներմուծումը։
